¿Que ye'l comerciu xusto?

comercio justo

El Comerciu Xusto ye un movimientu qu’escomencipió pelos setenta n’Europa. N’una crítica al sistema de rellaciones internacionales y denuncia d’un modelu internacional de comerciu inXusto por demás, de primeres, les organizaciones vendíen equí productos de países del Sur, p’ameyorar asina les sos condiciones de vida. Vendíase sobremanera en mercaos solidarios, conciertos... anque nun se crearen entá canales de distribución estables. Fuera nos ochenta, al consolidase les organizaciones importadores y apaicer munches tiendes de Comerciu Xusto, el movimientu escomencipia a medrar enforma. Al tiempu que crez el movimientu, son más clares cada vez les visiones estremaes qu’hai nes organizaciones de Comerciu Xusto. D’esta manera defínense dos maneres d’entendelo bien distintes:

Visión tradicional

Una ye la visión tradicional del Comerciu Xusto, qu’apartir d’unos criterios na producción (garantizar salarios y condiciones de trabayu dignes, garantizar que nun haiga esplotación infantil, respetu al mediu ambiente, igualdá de xéneru, pagu de parte del preciu por adelantao, invertir parte de los beneficios nes necesidaes básiques de la comunidá, rellaciones comerciales llargues, ente otros.), entienden el Comerciu Xusto como una forma d’ameyorar les condiciones de vida de los productores del Sur, anque sigue funcionando coles mesmas regles capitalistes de mercáu. Asina, búscase’l beneficiu másimu, contando con que cuanto más se venda más s'ayuda.

Nuestra visión

D’otramanera, nós, pensamos que’l Comerciu Xusto tien de ser un movimientu anticapitalista, que trabaye por romper les relaciones de dependencia Norte-Sur. Esto consíguese solo trabayando por recomponer los mercaos locales, tresformando n’orixe los productos y reduciendo enforma los intermediarios nos intercambios comerciales.
El Comerciu Xusto pol que trabayamos ye un movimientu social que, con una práctica comercial, un llabor de sensibilización y un trabayu de movilización social cuenta con camudar los modelos de rellaciones económiques d’agora y participar na construcción d’alternatives.

El Comerciu Xusto ye pa nosotres un procesu de cambéu de productos que, respetando’l mediu natural, busca’l repartu equitativu de los esfuerzos y los beneficios ente les participantes. Cola tresparenciaen tolos pasos del procesu buscamos que tolos actores, sobremanera’l consumidor, pueda tomar les sos decisiones con responsabilidá. Asina, hai qu’asegurar la tresparencia y la comunicación en toles argolles de la cadena comercial, reforzando’l principiu de confianza, que ye básicu nes nuestres rellaciones.
Pensamos que l’oxetivu del Comerciu Xusto ye, polo menos, doble: d’un lláu, fai actores críticos en toda la cadena económica; y d’otru, desarrolla espacios de práctiques alternatives que s’articulen en redes locales y globales qu’ayuden a qu’haiga una movilización social grande. L’oxetivu del Comerciu Xusto nun pue ser medrar cuantitativamente p’apurrir más recursos al Sur, ente otres coses porque nun vemos el Comerciu Xusto en términos estrictos Norte-Sur, sinón dende una perspectiva global de cambéu nos ámbitos de producción, de comerciu y de consumu. Ello ye que defendemos la Soberanía alimentaria, entendiéndola como’l drechu de cada pueblu a xestionar la so alimentación. Ye un drechu irrenunciable de los pueblos xestionar los recursos propios de forma sostenible. Asina, hai que poner los drechos de les personas y de les comunidaes a alimentase y a producir alimentos penriba de los intereses comerciales. La idea d’esportar productos del Sur, nun ye un fin en sí mesmu, sinón un mediu p’ayudar a los productores d’estos países a reconstruyir los sos mercados locales. Al tiempu, trabayamos tamién con productores locales, reforciando asina la nuestra soberanía alimentaria.
Tenemos qu’evitar treslladar les necesidaes de los mercados del Norte a les producciones del Sur, cuando puedan dir en prexuiciu de les maneres nes que, culturalmente, cada pueblu resolvió’l so equilibriu cola naturaleza. Escartamos tamién importar productos que yá se producen equí con unes con condiciones sociales y ecolóxiques apaecíes, porque nos paez que’l Comerciu Xusto son unos principios qu’han guiar les rellaciones comerciales, nel Sur y nel Norte y nun son namás una esixencia del Norte pa col Sur.