Espaciu por un comerciu xusto

espacio comercio justoL’espaciu ye un foru d’alcuentru y debate ente delles organizaciones de Comerciu Xusto que, con una visión crítica pa cola idea de Comerciu Xusto tradicional, compartimos una mesma llinia de trabayu.

Dende que la Coordinadora Estatal de Comerciu Xusto aprobara un sellu unificáu pensáu p’abrir les puertes de los productos de comerciu xusto a les superficies comerciales grandes, un bon puñáu d’organizaciones contraries a esi sellu empecipiamos a xuntanos y d’estos conceyos nació l’Espaciu por un Comerciu Xusto. Sóbrennos motivos pa refugar esti sellu ( FLO ). D’un llau, el sellu certifica al productu, non a quien produz o a la empresa. Ello ye que por exemplu Nestlé yá tien la so gama de productos de Comerciu Xusto, anque siga coles sos práctiques inxustes nos otros productos. D’otra manera, esti sellu nun fala más que de pagar un sobrepreciu a los productores, pero esti preciu diba siguir fixándose a resultes del que marque’l mercáu, asina que nun diba garantizar que’l preciu pagáu fuera Xusto.

Otramiente, nosotres entendemos qu’al distribuir los productos de Comerciu Xusto tenemos que caltener los mesmos criterios que na otra parte del procesu, colo qu’al dexar la distribución nes manes de les superficies grandes yá nun diben a esistir esos criterios (tresparencia, salarios dignos...).

En viendo que nun foi casual que s’aprobara esti sellu y n’afitándose cada vuelta más la división dientro del Comerciu Xusto con dos visiones bien estremaes, nel Espaciu por un Comerciu Xusto consensuamos un manifiestu pa espresar la nuestra visión del Comerciu Xusto y difundilu ente delles organizaciones más allá del ámbitu del comerciu xusto pa que sofiten y espardan esti manifiestu.